جلالة الملكة

أنا عارفه إنّ المقدّمة في أيّ كتاب في الغالب بتكون أسخف جزء فيه، وفي الغالب محدّش بيقراها، علشان كده قرّرت ما اكتبش مقدّمة، لكن هقولّك في الصفحة دي الكتاب ده فيه إيه! الكتاب ده مقسّم لجزئين: الجزء الأوّل جزء أبيض جوّاه نقطة سوداء لأنّي بحكيلك فيه عن رأيي في مصطلح المرأة القوية المستقلة، وتعريفي ليه من وجهة نظري، ومين هيّ جلالة الملكة؟ أمّا الجزء التّاني هو الجزء الأسود اللّي جوّاه نقطة بيضا لأنّي بحكيلك فيها عن العادات اللّي بتضعف جلالة الملكة، والحاجات اللّي مش بتعملها لأنّها قوية ومستقلة، وشوية آراء ملهمة تساعدك في وقت الأزمات. والحقيقة إنّي قصدت أخلط بين الكلام المحفّز والكلام المحبط في كلّ جزء علشان أوصّلك إنّ مفيش حاجة كاملة، مفيش حاجة كلّها حلوة أو كلّها وحشة…

اسماء دقماق